Phili 3 | GAM | STEP | Kandja ta paro ge embe, ye Iwa Kerman boll mor ge wo pille molme! Agana ambana kambono, ye wopake moye dje pille na kandja ge alla boro, na ke napro.

Philippians 3

Una Krais boll pillgi dji dal, God nale al wambo napanda kiwa moye

1 Kandja ta paro ge embe, ye Iwa Kerman boll mor ge wo pille molme! Agana ambana kambono, ye wopake moye dje pille na kandja ge alla boro, na ke napro. 2 Ye kanpol tane. Una kena kunda yendo mal mor ge, singare ke ye, una gaklene kelip to ye ke ye kerinj. 3 Una gaklene kelip tambonka God nale al kiwa mopon we djinj ge no pillgi ge al naparo, man, God Murble moro al, no une kandjiye amblo pla woro, Krais Jisas kandjiye amblo pla wormon pille no God wombaye mormon. 4 Pir mo? No gaklene al kogo yepin al ge no God nale al kiwa mormon we djinj ge kandja kaima paika na para kogo ye wanill al ge God nale al kamasa wambo napai, kiwa mollka. 5 Na kogo ye wanill we djindo ge, me embe paro. Ege 8-pela moll al ge na gaklena kelip toi. Na Juda una, Benjamin epilye moro. Na Ibru una kaima molo kerdo. Na yembe ye Mosis lo ge yell mo? Ge wale, na Parisi una moll. 6 God loye pai ge na yembe yell mo? Ge wale, na pillgi pai una to ke ye awill. Alla, Juda una God nale al wambo pa djinda dje pille yenekne loine yembe yenj ge, na para embe yell mo? Ge wale na embe ye kune ye kerill, ga nalene al na wambo napai. 7 Na embe yell ba na Krais boll moro pille, asa wal pille pla ye moll ge, wal kiwa dje pro. 8 Ge na Iwa Kerman Krais Jisas pille kane yendo ge, na kanill wal kerman paro, na Krais ino dje pille, asa wal porapora na pille pla yell ge, wal kerawa, kane kerill. 9 Na une boll moyo dje yendo. Na Mosis loye ye kune ye pagle God nale al kiwa moyo dje nayendo, man, na Krais boll pillgi djindo al God nale al kiwa moyo dje yendo. Nono pillgi djimbon al ge God yene djinda nono kiwa mopon. 10 Na Krais kanno dje yendo. God yembe yeika une aglo er pla woi mal ge, na God yembeye embe pai ge piyo dje yendo. Yene imb kaki mal na para kakno dje pille, une na pille goi mal ge na une pille goyo dje yendo. 11 Alla God na para amblo i pla worda dje pro.

Pol Krais abiyo dje pundo

12 Na wal djill ge, na ye pora djill dje pille na nadjindo. God ye wori na kune moll dje pille na nadjindo, man. Krais Jisas na dje i me paro ge, na ino dje pille yembe yendo. 13 Agana ambana kambono, na ill pora dji dje pille na nadjindo. Ba alla na wal yeno dje yendo ge embe. Wal asa pai ge na kerill, wal are panda ge na ino dje yembe yendo. 14 Na muk dje er welke po prais ino dje yendo. Prais paro ge embe mal paro, Krais Jisas kogo yei al ge, God na yau to i, na une boll kupill al molo pano.

15 Na kandja embe dje awill ge, nono iwana dongall mormon nomane embe panda mopon. Alla ye nomane djell ta panda ge, God amblo du dje aunda. 16 God singare ombine dje awi ipin ge, nono embe ye pa mopon.

17 Agana ambana kambono, na singare yendo mal ye karkar yene. Alla una no yenmon mal embe yenj ge, ye kane molo embe yene. 18 Asa na ye kune merke djill ge, na kimb ye molo kandja alla djindo, Krais iko pera al goi we djinmon ge una merke man dje kunda ye awinj. 19 Ga kond wanbon dje yenj al ge er wo ke pine paro. Wal kane nambon dje pille pla yenj ge, ga godne moro. Singare ngandjill paro ge, ga wo pir. Ga makimb wal nomane paro. 20 Embe yenj ba nono dumene kupill al yero. Iwa Kerman Jisas Krais kupill al kere er yem wo nono i yem worda dje, kui ye mormon. 21 Jisas yembe dongall al wal porapora i menameto woro kantau yendo mal embe, une yendaka nono gaklene djell ta mal panda mopon. Yene gakle wopake paro mal nono gaklene embe panda mopon.